प्रधानमन्त्री अभिव्यक्तिविरुद्ध प्रदर्शनका क्रममा नेविसंघका नेताहरू पक्राउ, तत्काल रिहाइ गर्न कांग्रेसको माग

Jun 2026

सीमा समस्या जस्तो संवेदनशील विषयमा प्रधानमन्त्री बालेन्द्र शाहले संसद्को रोष्टममा दिएको अभिव्यक्तिलाई लिएर आक्रोश व्यक्त गर्दै नेपाली कांग्रेसले ध्यानाकर्षण जनाएको छ ।

पार्टीले आज एक विज्ञप्ति जारी गर्दै सो अभिव्यक्तिलाई गैरजिम्मेवारपूर्ण भएको उल्लेख गरेको छ । उक्त विषयलाई लिएर आज सिंहदरबारको दक्षिण गेटमा शान्तिपूर्ण विरोध प्रदर्शन गरिरहेका नेपाल विद्यार्थी संघ का विद्यार्थी नेताहरूलाई प्रहरीले गिरफ्तार गरेको घटनाप्रति पनि पार्टीले आपत्ति जनाएको छ ।

प्रदर्शनका क्रममा राजकुमार बस्नेत, अर्जुन कार्की, आदित्य दास, दिनेश कार्की, मोहन कालाथोकी र गौरव पाण्डेलाई पक्राउ गरिएको बताइएको छ । शान्तिपूर्ण रूपमा विरोध गर्ने नागरिकको संवैधानिक अधिकारमाथि ठाडो उल्लंघन भएको दाबी गर्दै नेपाली कांग्रेसले पक्राउ परेका सबै विद्यार्थी नेताहरूलाई तत्काल रिहा गर्न सरकारसँग माग गरेको छ ।

यसैबीच, प्रदर्शन स्थल सिंहदरबार आसपास सुरक्षाकर्मीको उपस्थिति बढाइएको बताइएको छ ।